28 maart 2024 Gebruikers online: 44
Agenda
Active creations

Plat (column Teunie Rijfkogel)

Geplaatst op: 27 maart 2018

“Dialect in de verdrukking” kopte disse site veurige weke noar anleiding van de joarlijkse dialectoamd in de Sluuspoort. Hé, dacht ik, doar kan ‘k wat an doen. As ’t prachtige dialect uut disse streke in ‘n verdomhuukie dreg te raak’n, dan geef ik ’t wel een podium. Vanaf nou skrief ik mien columns alleen nog maar in ’t plat. Niet da-k ooit eleerd ebbe um dialect te skrie’m, maar doar is wel ’n mouw an te pass’n.

‘t Dialect uut disse buurte is mi-j met de paplepel in-egeut’n. Eigenlijk bin ‘k dus twietalig op’evoed, al zoll’n de meest’n doar wat anders teeg’nan kiek’n. Gelukkig veur mi-j kon ‘k beide taal’n goed eskeid’n hold’n. Want eerlijk is eerlijk, aj op skoele zitt’n met stads’n, dan ist nie sexy aj plat proat’n in de klasse. Op skoele proat’n ik dus vluuind abn, ma zodra ‘k thuus ware en ‘k as de bliksem mien olde plunje an had etrökkn, dan skakelde ik metiene over noar ’t plat. Thuus werd nie aanders ‘eproat dan dit, dus hoe ak ooit fatsoenlijk abn eb ‘eleerd, is mi-j ’n raodsel.

Miskien vi-j onze streektaal te boers en wi-j d’r niks met te maak’n he-m, maar wees ies eerlijk… Hef onze streektaal gien prachtige uutspraak’n?  Ik hol wel van die typische uutloating’n die aj narn’s maar dan ok narn’s aanders heur’n. Zo zei mien moe altied ak heur op de kaste joeg: “Mu-j ’n draeij umme de oor’n he-m?” En ak van onder tot boo’m smerig thuus kwame zei ze: “Wat bi-j toch ook ’n smeervark’n!” En heel soms – ja ‘k weet ‘t, ’t is zowat niet te geleu’m-  dan wa’k wel ies dom ‘ewest. “Wat bi-j toch ook ’n kuuk’n…” mus ik dan anheur’n.

Ja, op ’t plattelaand heur ie de streektaal nog weh. En hoewel ‘k snappe dat de jonger’n van nou ’t nie meer will’n praot’n, d’r is gien taal zo karakteristiek as streektaal. Starker nog, miskien bin de allermooiste verhaal’n nog wel de verhaal’n die verteld bin in ’t dialect. Dialect hef wat lee’mdigs.

Ik hope da-j d’r wat van he’m begreep’n en ’t een leuk stukkien vund’n. Ma vi-j ’t nou ’n slecht idee, zo’n column in ’t plat, of ko-j d’r gien touw an vast knoop’n,  vertel ’t mi-j dan ook gerust.

PS: He-j hier nou gien barst van begreep’n? Dan wordt ’t de hoogste tied daj oe ies wat meer in onze streektoal goan verdiep’n!

Gepubliceerd door Robert Jansema
Aquaservice